إسماعيل باشا

جاءنى هذا التاج من صديقة مدونتى إيمى ورغم عدم تفضيلى لموضوع التاج ده ولكن عند قرأتى للأسئلة شجعتنى على إبداء رأيى فى بعض الأمور وإليكم التفاصيل





لو قالولك اختارعصر من عصور مصر عشان تعيش فيه تختار اى عصر وفى عهد اى حاكم واشمعنى؟
اختار عصر إسماعيل باشا الذى حكم مصر من 19 يناير 1863 حتى 26 يونيو 1879
وفى عهده تمت أعظم الأنجازات المصرية فى التاريخ الحديث التى لم يحدث انجاز مثلها حتى الآن
وكانت له خطة تنمية واضحة مبرهنة بالفعل والإنتاج على أرض الواقع
فى عهده تم الآتى
أفتتاح الأنتيخانة والمتحف المصرى
أنشاء مصلحة البريد
أفتتاح مجلس الشورى
أفتتاح قناة السويس وقد أقيم حفل عالمى حضره ملوك واباطرة العالم منهم أمبراطور النمسا وأمبراطورة فرنسا وولى عهد روسيا والعشرات من أمراء أوروبا
أفتتاح أول دار أوبرا فى الشرق الأوسط
أنشاء شارع الهرم حتى يستطيع ضيوف مصر زيارة الأهرامات المصرية
أنشاء دار الكتب
أنشاء مدرسة دار العلوم (كلية العلوم)
أنشاء كوبرى قصر النيل من قبل شركة فرنسية وكوبرى الجلاء من قبل شركة انجليزية
أنشاء ميدان التحرير وحديقة الأورمان وحديقة الحيوانات
أدخال نظام أوروبى بإنارة الشوارع ليلا بغاز الأستصباح
أنشاء خط سكة حديد حلوان
أنشاء أول خط للخطوط التلغرافية
صدور أول دستور عادل ونزيه فى تاريخ مصر

كما أنه أول حاكم فى تاريخ مصر يمنح أعلى رتبة لمسيحى فى ذلك العصر وقد استحقها نوبار باشا
وكان عصره هو الأكثر تسامحا وقربا بين طائفتى الشعب حتى أن المسيحيين كانوا يبنون المساجد بكل ود ومحبة تعبيرا عن امتنانهم لانصاف إسماعيل باشا لهم
ولا ننسى قراره انه فى حالة خروج أحد المسيحيين عن الدين المسيحى إلى الدين الأسلامى يجب أن يوقع أحد القساوسة أن ذلك الشخص غير ديانته بمحض إرادته ودون أى ضغوط عليه



اول اولوية فى حياتك عيلتك ولا شغلك ولا اصحابك؟
والله هو بيبقى على حسب الحدث نفسه
يعنى لو فى اجتماع مهم فى الشغل هيبقى ليه اولوية مطلقة ولو فى خروجة جامدة موت هيكون ليها أولوية مطلقة ولو فى عزومة عند حد من قرايبنا فيها ما لذ وطاب هيكون ليها أولوية مطلقة
كده يعنى

ايه اكتر حاجة بتحبها فى رمضان ؟
إن الشوارع بتبقى فاضية ساعة الفطار وانا دايما برجع من الشغل فى التوقيت ده فبعمل زمن قياسى فى الرجوع من الشغل للبيت

اجمل فطار ممكن تفطره؟
انا مسيحى إلا إنى غالبا بصوم رمضان برضه باستثناء كام سيجارة على كباية شاى وبفطر مع زمايلى فى الشغل كل يوم تقريبا

لو انت حاكم على مجموعة من الافراد حتكون عادل؟
ده بالتأكيد يعنى هى دى عايزة كلام

00 اللى بيبوظ الحكام ..نفسهم ولا الشعب ولا الحاشية المقربة؟؟00
ينبغى أن يخاف الحاكم من شعبه لا أن يخاف الشعب من حاكميه
لن أنسى هذه العبارة التى سمعتها فى فيلم
V for Vendetta
وإذا كان هناك الفساد والجهل والمرض والفقر فاسأل الشعب الذى ارتضى لنفسه حياة الذل والهوان

مين اكتر اعلامى مصرى بتحترمه؟؟
مفيد فوزى

لو ممكن تشتغل شغلانة تانية غير اللى انت بتشتغلها أو كنت بتشتغلها كنت تتمنى تبقى ايه ؟؟ 00

كان نفسى طول عمرى أكون مخرج سينما بس لما كبرت أدركت إنى لو عايز أشتغل مخرج يبقى لازم والدى يكون اسمه وحيد حامد أو والدتى تكون دلال عبد العزيز

ايه تانى بلد تتمنى تعيش فيها بعد مصر؟؟
عملوا احصائية فى سويسرا ووجدوا أن من بين كل 37 مواطن سويسرى فى واحد مليونير
وعملوا احصائية فى الأمارات ووجدوا أن من بين كل 56 مواطن إماراتى فى واحد مليونير
بس انا بقى اتمنى أعيش فى استراليا لأنها فعلا بلد الأمن والأمان ومعدل الجريمة فيها منخفض تماما

اوصف ليا ترتيبات اجمل فرح ممكن تحضره؟؟
ولا ترتيبات ولا حاجة
هحلق دقنى واضرب البدلة واروح على هناك

بتراعى كلام الناس والقيل والقال؟ لو اه او لو لا قولى ليه؟
طبعا ده بيتوقف على مدى ثقتى فى رأى ودماغ الشخص اللى بيتكلم مش أى ناس وخلاص

صحيت من النوم مالقيتش الموبايل ولا الكمبيوتر ولا الكاميرا الديجيتال ولقيتنا رجعنا لعصر الحمام الزاجل والحصنة

حتبقى سعيد؟

هتأقلم مع الوضع الجديد بس مش مهم مستوى التكنولوجيا المهم مستوى الأنسانية والآدمية فى الحياة نفسها

السعادة هى؟؟
السعادة هى النجاح
النجاح فى الدراسة، النجاح فى العمل، النجاح فى قصة حب، النجاح فى الحياة
هى دى السعادة الحقيقية

عندك امل ؟ اسبابك ؟
مين فينا يقدر يعيش من غير أمل وإذا كان فى حد كده يبقى ميت مش عايش
أما عن الأسباب فتقدروا تعرفوها لما تسمعوا أغنية الأمل لأنغام فى شريطها الجديد

لما تحب تهرب من كل شىء بتروح فين؟؟
بطلع على المقطم

امتى أول مرة اخدت فيها نفس طويل كده وقلت بينك وبين نفسك يااااااه انا فعلا كبرت ؟؟
لما ابتديت أفكر انى المفروض اكون أسرة وافتح بيت وابقى مسؤول عن زوجة وأطفال بس طبعا ده شكله مش هيحصل قريب خالص


لما بتعمل عمل خيرى بيكون ايه هو دافعك الاول؟؟
إن ربنا يقدر يستخدمنى عشان اساعد حد محتاج فعلا

بتشرب سجاير؟لو الاجابة اه ايه شعورك لو شفت ست بتشرب سجاير وليه؟
بشرب سجاير آه
وفيها ايه يعنى لما ست تشرب سجاير
هو احنا عايشين فى قبيلة قريش ولا إيه ؟


بتعرف ايدك اليمين من الشمال ازاى؟
منا شايل فى جيبى بوصلة على طول أعرف بيها الإتجاهات


ايه اكتر اله موسيقية بتحبها؟
الناى


فى رأيك ليه الذوق والنخوة اتعدموا؟
ومين قال انهم اتعدموا


ايه الحاجة اللى لو حصلتلك تبقى سعيد قوى؟
إن مصر يحصل فيها تنمية حقيقية زى اللى كانت أيام إسماعيل باشا


تختار يبقى عندك ارض زراعية ولا اجنص عربيات ولا كام عمارة ولا فلوس فى البنك؟
فلوس فى البنك عشان اقدر انتج أفلام سينما وأخرجها بنفسى


البحر ولا النيل؟
البحر


مركب ولا طيارة؟
طيارة


عاقل ولا مجنون؟
هذه يتوقف على رؤية الآخرين لى لا على رؤيتى لنفسى
ولكن انا اقف امام المرآة حائرا هل انا عاقل أم مجنون


تقرا كتاب ولا تتفرج على فيلم؟
اتفرج على فيلم