Monday, August 13, 2007

اختبار الأمن المركزى





لم أعرف كيف كانت عالية صوت ضحكاتى حتى أخبرنى صديقى فيما بعد بأنها لو كانت ترددت فى القبور لكانت كافية لاستيقاظ الجثث المدفونة من سباتها الأبدى ليس فقط بسبب شدة ارتفاع الصـــوت ولكن بسبب فضولهم لمعـــرفة على أى شىء يضحك هذا المجنون لهذه الدرجة
00
ورغم كون صديقى السبب الرئيسى فى تعالى هذه الضحكات الا انه انكر مسؤليته وخرج من الشقــة تاركنى مستلقى على السرير غارقا فى موجات من الضحك الهستيرية التى لا أعرف السيطرة عليهـا ولا اعرف كيف اوقفها
0
كانت زيارة عادية كأى زيارة له يأتى بالهارد المحمل بأحدث الألبومات الغنائية وأحدث الأفلام العربية والأجنبيــــــــــة بالأضافة لبعض فيديوهات للمتطرفين وهم يذبحون الخونة ورغم كونه مسلم الا انــــه متضارب الآراء تجده تارة يؤيد قطع اليد للسارق وتارة ينفى أن يكون الأسلام بمثل هذه الوحشية و.... ...... ...... وما علينا
0
0
استمرت عملية النسخ لمدة تزيد عن ساعة وفى آخر اللقاء وقبل أن نغلق الجهاز فاجأنى بسؤال قائلا : انت تعرف بيختاروا عساكر الأمن المركزى ازاى ؟
0
هززت رأسى بالنفى واكدت جهلى بالإجابة سائلا اياه : ازاى ؟
0
بدأ حديثه وهو يحاول فك الاشتباك بين سلوك الجهاز ليستطيع الخروج بالهارد سليما معافا كما أتى به
0
بص يا سيدى ... بيوقفوهم فى ساحة كبيرة وينادى واحد فى الميكرفون بصوت عالى جدا ( اللى مبيعرفش يقرا ويكتب يقف فى الجنب اليمين... واللى بيعرف يقرا ويكتب يقف على الجنب الشمال ) ويستنى دقيقة كده...بيفضل شوية كده واقفين فى النص ...........................00
هما دول بقى اللى بيبقوا عساكر الأمن المركزى

0

0

0
كنت اتخيلها نكتة لذلك استمرقت فى الضحك رغم ما اكده لى صديقى بعدها بإنها الحقيقة وان هذا ما يحدث فعلا...لم اصدقه وسخرت منه ومن الشخص الذى حكى له هذه الحكاية لأنه بالتأكيد كان يسخر منه هو الآخر ولكن بعد أن شاهدت هذا الفيديو لبطله عسكرى الأمن المركزى....ايقنت تمام اليقين انها ليست ببعيد أن تكون هى الحقيقة فعلا

29 comments:

أشرف حمدي said...

ظريفة جدا هذه التدوينة
اللي في النص دول أكيد مافهموش السؤال أساسا وبالتالي هم أجدر من يقوم بدور جنود الأمن المركزي

هم يعرفون كلمة واحدة
إضرب
فيضربون

تحياتي

قلوب حائرة said...

ماشي ياميراج ماشي ليه تقول عليهخم ليه كده ربنا هيوديك النار

Doba said...

انا بس نفسى اعرف ايه اللى خلاك تقعد تضحك - ايه الشىء المميز والحاجة اللى تسعدك فى الموضوع ده كله

ممكن اعرف؟؟

سمـــــــــــا said...

ههههههههههههه عمار يا مصر

shahy said...

انت بتتكلم على الامن المركزي
اية الداعي انك تجيب سيرة الاسلام وقطع الايد والكلام دة
ولما هو ما علينا بتتكلم من الاول لية؟

اما بقى حكاية العساكر دي كل اللي اقدر اقولة ان الناس دي غلابة اوي واذا كنت ضحكت يبقى شر البلية مايضحك

والعيب على البهوات اللي صوروهم واتريقوا عليهم

سوري اذا كان كلامي قاسي بس هو دة اللي حسيت اني عاوزة اكتبة

سلام

علوة said...

عجبتني جدا طريقتك في الكتابة متأثرة أوي بالسينما معرفش ليه انا وصلني الإيحاء ده
من رأيي انت وصفت تذبذبات صاحبك لاهتمامك بوصف الشخصية ودي أكتر حاجة بتميزه عشان كده قلتها ولنفس السبب - اهتمامك بالوصف - ذكرت انه بيفك الهارد بطريقة أدبية لطيفة
أما بقى النكتة .. اللي هي صلب البوست
بصراحة رغم اني عارف الموضوع ده من زمان إلا إني كل ما افتكره أضحك
وبعدين استغرب مش على عقول الجماعة الغلابة دول
ولكن على استخدام العقول دي بطريقة تثبت أن المطلوب مش جنود .. المطلوب اسحلة .. يعني عسكري الأمن المركزي اللي بياخد 80 جنيه في الشهر وبياكل علب محفوظة منتهية الصلاحية مفيش فرق بينه وبين الدرع اللي ماسكه
للاسف دي كوميديا سودا
بتخليك تضحك بس محتاجة تبص وراها
عشان تفهم
تسلم ايدك وانا سعيد اني عرفت طريق لهذا البلوج المركزي
lol
واسف للإطالة

smraa alnil said...

هههههههههههههههههههههه


انا كل كعلوماتي ان هما بياخدوا اللي مش بيعرفوا يقروا ويكتوبا

لكن موضوع النص دة جديد عليا

هههههههههههههه

عامة هو مين في البلد بيفهم

غيرنا طبعا
:))

EGYPT EYES said...

عساكر الأمن المركزي هم أبناء الفقراء والسخريه منهم شئ مقرف مش مضحك

سؤال بقى على الهامش
.........................
أنت متطرف ياميراج؟!

micheal said...

أنا برضه سمعت النكته دي زمان و ممكن جدا تكون حقيقه
:)
المهم أنا معترض علي حاجتين
أولا...مالهاش لزمه خالص تدخل موضوع قطع يد السارق في بوست يستكلم عن الامن المركزي لان دي امور تتعلق بالشريعه الاسلاميه و ليس من حق غير المسلم التدخل فيها
ثانيا...الشخص اللي صور هذا الجندي و حطه علي سايت اليوتيوب انسان معندوش دم لان كان ممكن جدا هو اللي يطلع جاهل و أمي و يبقي عسكري أمن مركزي
تحياتي لك يا ميراج

3abdo me7tas said...

اولا الفيدو مش راضى يشتغل يا مان
تانى حاجه انا تقريبا شفت الفيديو ده
بس لو جيت نمسأل نفسنا هو الانسان ده كده ليه يعنى مفيش اى معلومة عنده خالص ليه
هتلاقى السبب مش فيه لا فى ال ولا بلاش يا عم انا عايز أعيش
المهم انا مش عراف اقولك ايه بس احنا كده بنتريق على واحد ملوش أى ذنب انه مش عارف اى حاجه عايش تايه فى الدنيا بس اكيد فيه حاجه فيه احسن مننا مش عارف ليه
يمكن عشان احنا متعلمين وهو جاهل لدرجة مش عارف حاجه عن بلده بالمرة يمكن عشان كان فى الأرض علطول شغال فيها وبينام من المغرب ويصحى الفجر على الأرض ولا عشان يمكن مكنش بيتفرج على التلفزيون او الدش ولا عشان مكنش بيعرف يقرى او يكتب
فيه حاجات كتير
بس انا شايف اننا بنتريق على انسان
هو انسان يا جماعة مش حيوان
بيحس
بيبكى
بيضحك
بيحب
بيكره
فيه كل الحواس اللى ربنا إدهالك وغدهالى واداها للناس كلها عربى واجنبى مسلم ومسيحي
كفاية كده
مش لاقى كلام اقوله او بمعنى اصح خايف اجرح احساس واحد فينا
ربنا يهدينا جميعاَ لعمل الخير يا رب

Mirage said...

أشرف حمدى

والله عساكر الأمن المركزى دول حاجة تكسف فعلا ومتعرفش ازاى هما بالجهل ده فعلا
ولافى اى توعية ولاتطوير ولا اى حاجة
هى فعلا زى مابتقول
اضرب يضرب على طول


قلوب حائرة

انتى بتفولى عليه ليه من دلوقتى
انا لسه صغير
مش يمكن الحق اتوب قبل ماموت


دوبا

والله انتى ممكن يكون معاكى حق لأنك لو بصيتيلها من ناحية ان دول ولاد بلدك وجهلهم مش ذنبهم ممكن تلاقى الموضوع يبكى مش يضحك
بس تقدرى تقولى ان انا ضحكت زى مانتى ممكن تضحكى على اى نكتة على واحد صعيدى
والا انتى مش بتضحكى على نكت الصعايدة برضه ؟


سما
عظيمة يامصر
دايما عمار ياسما

شاهى
مدونتك وبيتك وطرحك
وتكتبى زى مانتى عايزة مفيش داعى لسورى اصلا
وردى على دوبا هو ردى عليكى بخصوص نقطة دول عساكر غلابة
اما بخصوص سيرة قطع اليد
انا كنت بتكلم على واحد صاحبى
واقع يعنى
مجبتش حاجة من عندى
وبعدين هو انا قلت حاجة تضايق او تزعل ؟
ده كان مجرد رغى عادى

علوة
أشكرك على تعليقك اللطيف ده
والبوست بتاعك على مصطفى كامل جامد جامد جامد
وفعلا عساكر الأمن المركزى ليسوا أكثر من آلة فى يد النظام
انا اتشرفت بمعرفتك واهلا بيك فى أى وقت

أشرف حمدي said...

باشا
انت ساكن في آخر فيصل انت كمان ولا ايه ؟
عموما ايوة أنا أبو شنطة سودا وتي شيرت أصفر :)
وردت عليك في مدونتي
تحياتي

Mirage said...

samraa alnil
انا مش عارف مستوى الجهل اللى احنا فيه ده هيفضل كده لحد امتى
حرام والله
هى مش مسألة حد بيفهم أو لأ
ماهو اكيد فى ناس كتير بتفهم فى البلد
بس محدش بيشتغل
محدش بينتج
محدش بيعمل حاجة

egypt eyes
زى مارديت على دوبا وشاهى
انا واخد الموضوع زى مانت ممكن تضحك على نكتة واحد صعيدى
هو الصعيدى ده يعنى مش ابن مصر برضه

وبعدين تقصد ايه بمتطرف دى ؟
متطرف ازاى يعنى


michael
والله انت محيرنى معاك
انا ابتديت احس انك مسلم وعامل نفسك مسيحى
تعرف تسمعلى ابانا الذى طيب ؟
:)
انت عايز ايه ياعم انت
انت مالك اصلا ؟
ده انت انسان غريب والله

sorry for being aggresive,
بس اصلك ردودك دايما مثالية قوى زيادة عن اللزوم

اهلا بيك فى أى وقت ومشرفنى دايما

وانت كمان عمرك مضحكت على نكتة واحد صعيدى قبل كده ؟



3abdo me7tas
اولا
الفيديو اشتغل معايا عادى

ثانيا
والله انا فاهم ومقدر الكلام اللى انت بتقوله ده كله والله
بس الموضوع ابسط من كده يعنى
انتو مكبرينه قوى كده ليه
اقرا ردودى اللى فوق وهتفهم وجهة نظرى أكتر

فرحة said...

هاى ميراج
على فكرة انا اول ما شفت الفيديو قاعدة اضحك وكنت هاموت من الضحك بس بعد كام يوم دخلت تانى وشفت الفيديو وحزنت جداً عارف لية
هو مش جاهل اد ماهو خايف
اة خايف
خايف يقول اى حاجة تطلع غلط أو صح وزى مابيعملوا فى باقى الشعب يعملوا فية
خايف يضرب على قافها وياريت خوفة هايجى على اد الضرب بس طبعاًانت عارف اللى ممكن يحصلوا علشان شوية ضباط عايزين يضحكوا شوية بدال الهم الى الشعب موريهلهم
شفت بقى الخوف ممكن يكون اقوى واصعب من الجهل ازاى
تحياتى

micheal said...

ههههههههههههه...هي ايه الحكايه ...أنت مش أول مسيحي يقولي البقين الحلوين دول
:)
هو دايما كل ما الواحد بيكون حقاني و محايد مبيعجبش
:)
ما علينا...بلاش نظريه المؤامره يا سيدي..أنا مسيحي بس مبيعجبنيش اي كلمه فيها تلمحيات سخريه من أي دين...فيها حاجه دي؟؟
تحياتي لك يا ميراج

coffee break said...

الموضوع و ما فيه من وجهة نظرى مش غباء عساكر الأمن المركزى أد ما هو افترا السلطة
يعنى لو جينا نحلل الفيديو دة، تفتكر مين اللى هيكون مصوره أو بمعنى آخر متصور بإذن من مين؟ ما أكيد بإذن من الناس اللى فى الداخلية اللى فوق الراجل العسكرى الغلبان دة و الغرض منه إنهم يضحكوا و ينقلوه بالبلوتوث على موبايلاتهم و الراجل دة مش غبى لأنه لو غبى كان جاوب، الراجل دة ذكى لأنه فهم إن الغرض إنهم يضحكوا فسايبهم يضحكوا من باب خلى العيال تفرح لأن أصلا مفيش حد من الغباء بحيث إنه مايعرفش إن حرب اكتوبر كانت سنة 73 و بين مصر و اسرائيل
و الفيديو أصلا متصور بنفس المبدأ اللى اتصور بيه فيديو الراجل اللى الظابط قعد يضربه بالقلم و الست اللى الظابط قعد يضربها بالعصاية
هو دة مفهوم الإنترتينمنت عند الداخلية :)

The Alien said...

أنا مش بعرف أشوف الفيديو دي
بس متخيل اللي فيه
ودا الل بيقولوا عليه هم يبكي وهم يضحك
بس دا هم بيضحك بزيادة شوية

كنت بتسألني بروح فين ف الصعيد
أنا بروح المنيا عشان أهلي عايشين هناك

تحياتي

tona said...

طب انت بتتكلم وبتقول مش عارف هم ازاي بالجهل دا

ولا هيفضلوا كده لحد امتي

طب هو انت اساسا كنت عملت ايه تساعد بيه ان واحد زي دا يتخلص من جهله

وواحد زي السادي اللي صوره يبطل يتتريق علي خلق الله بالشكل دا

انت اكتفيت بالتريقه
انت زيه علي فكره
عايش علي الهامش برضه
في دايره مقفوله علي شويه اهتمامات خاصه بيك
هو لاذنبه انه بالجهل دا
ولا ذنبه ان اتحط في مكان غلط

غمض عينيك said...

فعلا تحس ان بتوع الامن المركزي دول مغيبيين عن الدنيا وايعلرفوش حاجة ابدا عن اي حاجة
يدوبك عايشين
وياترى دا ذنب مين

تحياتي
محمد سمير

david santos said...

I passed to congratulate it with its work and to desire a good August to it in vacation.

ايوية said...

والله العساكر دول غلابة

اجندا حمرا said...

صدقيني ياميراج عساكر الامن المركزي دول اغلب من الغلب نفسه
يعني هو انت شايف شغل في البلد حيعملوا ايه اللي ماكانش ليهم حظ في التعليم عشان ظروفهم المعيشيه السيئه و خصوصا لو عندهم اسره؟ماقدمهمش للأسف غير كده

عباس العبد said...

يا ميراج شيل الكليب و التدوينة دى
لأنهم عيب جدا
عيب جدا انك تسخر من غلب و فقر و جهل اشخاص بعذا التواضع و الغلب و الضعف
حاجة مقززة جدا و مهينة جدا

علوة said...

أنا أسف جدا جدا لعدم التعليق على الموضوع
بس انا عايز منكوا خدمة يا جماعة
يا ريت تدخلوا البلوج بتاعي وتشوفوا الموضوع بالظبط
أنا أسف تاني لعدم التعليق بس انا معتمد على إننا اصحاب
أرجو انكوا تيجوا عندي أول م تقروا الكلام ده

misrology said...

بس تقدرى تقولى ان انا ضحكت زى مانتى ممكن تضحكى على اى نكتة على واحد صعيدى
والا انتى مش بتضحكى على نكت الصعايدة برضه ؟

ليه اكده يا ولد العم

EmY said...

فعلا مصر في ايد تفيده
هو ده المستقبل الشرق في شرطة مصر الحبوسه

الشنكوتي الكبير said...

يا ريتك كنت جيبتلنا كليب بيتريقوا فيه على ظابط كبير بعد ما قام بتعذيب مواطن غلبان على الأقل كانت شماتتنا فيه هتبقى مفهومه مش تقعد تضحكنا على واحد غلبان زي ده
انا مش هلومك كتير لأن انا شايف الناس شادين حيلهم عليك ونازلين فيك نقض مع ان كلنا ساعات بننسى ونضحك على ناس غلابه برده
وابقى بطل تتنيل تعك وتجيب سيرة الإسلام عشان محدش يحسبك متطرف ولا حاجه
عموما سلام بقى ابقى عدي عندي يا بيه بقالك كتير مش بتيجي
سلاااااااااااااااام

احساس لسه حى said...

عزيزى
اول شئ دى نكته
لان دول بنى ادميين زيك زيهم وممكن تلاقى منهم اللى اذكى منك
بس سنهم صغير وغلابه والخوف وحش
تانى شئ زى ما قالتك شوهى مال قطع اليد والوحشيه هو اللى بيسرق انسان محتاج مش وحشيه واللى يسرق انسان ويضيع مستقبله وممكن يتسجن سنين مش وحشيه واللى يسرق واحد ممكن يكون هيجيب دوى مش وحشيه
اظن اللى يشوف قطع ايد السارق وحشيه يبقا بيفكر يكون حرامى وخايف
خد بالك انا اتسرقت مره
وقولت اللى سرقنى مش يستاهل قطع ايبديه بس يستاهل رقبته كمان
لانه ميعرفش انا محتاج المبلغ اللى سرقه فى ايه
والله اعلم راح سكر بيه ولا حشش بيه
يا استاذ انتى تعرق الديانات الاخرى حكم السارق فيها ايه
بس للاسف كل دين بيدارى احكامه
انتى دينك ايه وانا اقولك
سلام

Montana Master Of Love said...

عجبتني جدا وانا بدور صدفه علي استناد لردي علي اخر مقال لابو حميد في الظروف ال بنمر بيها كنت عاوز استند بطريقة اختيار عسكري الامن المركزي وكنت انت المستند الجميل دا و تشرفت بمقابله الوجوه ال بحبها بردودهم من زمان هنا
يارب يحفظكم ويحفظ مصر