Thursday, June 21, 2007

حمام الهنا


اكتب اليوم عن حاجة بعيدة عن الرومانسية
لكنها ليست بعيدة
بل هى على النقيض تماما

فسوف اكتب عن الحمامات

هالعنى خبر قريته على النت بيقول ان محافظ القاهرة هيفتتح دورات مياه جديدة ذكية فى عيد العاصمة القومى السادس من يوليو اللى جاى

خد عندك بقى ياسيادة المحافظ

اولا
دلوقتى الحمام ده هيبقى بكروت والمرة بنص جنيه
طيب هى الناس لاقية النص جنيه اللى بتتحشر بيه فى الميكروباص لما هيدفعوه فى حمام
وهل تعتقد ياسعادة المحافظ ان الشعب على درجة من التحضر الكافية اللى تخليه يدفع فلوس فى حاجة زى كده ؟
ماهو اى واحد مصرى بيدارى ورا اى شجرة وبيصرف اموره
ولو نضيف شوية بيدخل كنتاكى ولا ماكدونالدز
ولو نضيف قوى قوى بيتتك على نفسه لحد ميروح البيت لأنه اكيد هيبقى خايف من الامراض
ده حتى المصرى فى امريكا...بيعملها فى كباين التليفونات المقفولة

ثانيا
بقى انت ياسعادة المحافظ مش مكسوف من نفسك وانت نازل تتمختر تهز فى طولك وعرضك عشان تفتتح حمامات
يعنى خلاص ؟
حليت كل مشاكل العاصمة وقاعد فاضى فى المكتب عشان تخصص يوم بحاله تنزل تفتتح فيه حمامات ؟

طيب شوف مشاكل المرور و المحور اللى واقف كل يوم والناس اللى بتتعذب فى الجو
ده
شوف الشحاتين والمعوقين والمجانين اللى ماليين شوارع وسط البلد ومخليين منظرها زبالة
شوف الشوارع اللى بقيلها عشرين سنة مترصفتش

ياأخى اتقى الله
حرام عليك
انت مش مكسوف من نفسك

محافظ يفتتح حمامات

عمرك قريت خبر زى ده فى دولة متقدمة كانت او حتى متخلفة


ثالثا
اكيد طبعا الحمامات دى تكلفتها مهولة من حفر لمواسير لصرف صحى لسيراميك لتركيبات اخرى لتشطيب وهلما جرا واكيد برضه ان السيد المسؤول مش هيعدى الطبق من عليه غير لما يغمز بلقمة
وهو يعنى فى حاجة بتتعمل لله وللوطن كده ؟
ده غير بقى طبعا مصاريف التشريفة بتاعت سيادته لاول حمام هيفتتحه غير اليفط اللى هتعلقها رئاسة الحى و اصحاب المحلات ترحيبا بسعادته عشان ينولوا الرضا من فخامته
دى بلد ايه دى بس


انا بقى عندى سؤال اخير

هو المحافظ ناوى يفتتح الحمامات زى مبيفتتح اى حاجة عادية ولا هيبقى ليها طريقة خاصة ؟

يعنى هيركبولوا شريط احمر وهو يدخل يقصه
ولا ممكن مثلا يجهزولوا شوية بيبييه طازة فى التواليت وهو يدخل يشد السيفون عليهم ؟

عار عليك ياسيادة المحافظ ماتفعله بنا وبالعاصمة
دى لوكان ليها لسان كانت قالتلك كلمة مش كويسة

ياريت لو حد يعرفه يوصلله الكلميتن دول
يمكن يحس على دمه

36 comments:

عمرو غريب said...

طيب يا عم والله كويس اوي ان هما هايفتتحو حمام احسن من مفيش

ناردين said...

دا هي دي قمة الرومانسية..
بجد ضحكتني مع ان الموضوع ميضحكش .. وعندك حق أكيد هيفتتحه بشد السيفون ..
بس لو فرضنا ان هنا في بلدنا الجميلة بشعبها المتيسر المثقف الواعي .. هيستخدموا الحمامات الضرورية جداً واللي الشعب مكنش عارف يعمل ايه من غيرها الصراحة ، وهيستخدموها في غرضها بس مش في اغراض اخرى والعياذ بالله يعني ..
بس يا ترى الكروت الذكية دي هتتباع في المحلات يعني تلاقي شخص وجيه كده واقف عند السوبر ماركت لو سمحت من فضلك كارت حمام؟
ولو الواحد جه يشغل الكارت لقاه خلص وهو ناسي ، والموضوع ضروري معاه مش هيلحق يجيب كارت حمام تاني يعمل ايه؟
بس اقولك ، متقلقش .. لو نفذوا المشروع الجهنمي .. دا فرضاً ..( لان ممكن بعد ما يخلصوا وياخدوا الفلوس ف جيبهم يبيعوه للشحاتين والمعتوهين والمجانين اللي ف وسط البلد عشان يبقى مركز التجمع بتاعهم ياخدوا فيه بريك من السخافة ع البشر وشاي وحاجة ساقعة وكده)،فلو اتعمل فعلاً أعتقد اللي بيكسروا السور عشان يعدوا بعيد عن طرق عبور المشاة ، واللي بيسرقوا كابلات التليفون وحديد السكة الحديد ، مش هيسيبوا اجهزة الكروت الغبية تفضل شغالة ..
وبجد عمااااااااااااااااار يا مصر ..
موضوع ف الجون يا صديقي

micheal said...

هيا الحمامات كمان بقت ذكيه
يا أهلا بريحه الحبايب
:)
تحياتي لك

غمض عينيك said...

باشا طب وكروت الشحن هنجيبها منين
وهيكون في خدمة عملا بأه وكده ولا ايه النظام
:)

مش بفلوس الحمامات دي برده كان ظبط الناس بتوع العشواءيات والناس اللي مش لاقية ميه نضيفة تشربها
تحياتي
محمد سمير

Miss Egyptiana "Trapped Soul" said...

هو انا معالك انها حاجة فقع... بس زى ما عمرو غريب قال اهو احسن من مفيش خالص... واعتقد ان الموضوع فى الاساس مش للمواطنين ... بل للسائحين الى بيشتكوا من الموضوع ده وبيعتبروه احدى النقاط السلبية فى مصر ... بالاضافة طبعا للمشاكل الاخرى واهمها المرور

shahy said...

اية بس اللي دخلك في السكة دي
يادي المصاريف اللي مش على البال ولا الخاطر يعني اجيبلك عيش وحلاوة منين دلوقت

ابقى اعرفلي عنوان الحمامات دي علشان نروح نفتتحها احنا كمان اشمعنا هو

سلاااام

NeRmeeN said...

هههههههه فعلا هم يضحك وهم يبكى....عارف لو كان بنى الحمامات دى وسكت انا ماكنتش قلت حاجة...لكن هما محسننا انهم هيفتحوا عكة...قال كروت شحن قال :S

تحياتى

.:.-=- ELGaZaLy-=-.:. said...

دة فعلا الى الشعب محتاجة فعلا


الحممات...

only spot said...

حقا شر البريه ما يضحك
الناس دول دماغهم هتودينا لحد فين بس جهل والناس عايشه فيه واستهلاك واصبحنا والحمد لله مجتمع مستهلك من الدرجه الاولى وسرقه ونصب واتعلمناها على ايديهم كله بيسلك رزقه ومن الايد البطاله نكسب وتشرد والناس متشردين فى قلعة الكبش والعشوائيات
طب ما يحلو مشاكل الناس الى عايشين فى العشوائيات والشوارع
ولا هم لقوا الاحسن ينفعوا ويستنفعوا اهو بما ان نسبة الى فى الشارع اكتر من الى عندهم شقق يبقى يوفرولهم حمامات وكمان يستنفعوا ويستفيدوا بثمن كروت الشحن
بجد هم يضحك وهم يبكى وعمار يا مصر
تحياتى

Alexandrian far away said...

حقيقي شىء غريب فعلا
أنا مش فاهم أيه وجه السخريه والتريقه على الموضوع!!!!
يا أساتذه من أسباب صفر المونديال العظيم أن القاهرة مافيهاش حمامات عامه
شىء أكيد مهم أنه تكون فيه وسيله متحضره عشان الأنسان يتخلص من فضلاته
وبدل ما يتكوم ورا شجره ولا تحت كوبري زى الكلب الضال يحترم نفسه ويحافظ على كرامته، حاجه عجيبه قوى أنكم تشوفوها سبب للسخريه

Mirage said...

عمرو عريب
ماهو ياعمرو فى حاجات كتير اوى اولى من الحمامات دى
اصلك مش عايش فى العاصمة ومش عارف

ناردين
مفيش كلام اقوله بعد عمار يامصر
على رأيك
عمار يامصر

michael
واى حاجة تيجى من ريحة الحبايب
بس خليك فاكرنى بقى
;)

غمض عينيك
تصدق موضوع خدمة العملاء ده حاجة مهمة جدا نسيت اتكلم عليه
المفروض فعلا يجيبوا كام واحدة كده من بتوع موبيبنيل وفودافون يشتغلوا خدمة عملاء
اهو منها تشجيع للشعب ومنها اهتمام بالشباب

miss egyptiana
انا معاكى فى موضوع السائحين ده بس انا اكتر حاجى استفذتنى موضوع المحافظ اللى نازل يفتتح حمام ده
حاجة تكسف بجد

Mirage said...

شاهى
متفوليش عليه وحياة ابو الدراويش
ده انا لسه بقول ياهادى
اما لما اخبط فى الروس الكبيرة هتعملى ايه ؟
بس اعرفيلى عنوان هيئة حروق الانسان من دلوقتى عشان أأمن ضهرى


نرمين
اه بالظبط
هى دى النقطة
ياريت عكا
دول كأنهم هيفتحوا الاندلس مش عكا


الغزالى
هى دى الحاجة الوحيدة اللى ناقصةالشعب فعلا


only spot
هى على فكرة شر البلية مش البرية
:)
جيه من بلوة يعنى
المسئولين دول مش هيفوقوا غير لما تحصل كارثة حقيقية فى البلد
خليهم ماشيين زى ماهم ماشيين


alexandria faraway
ايوة بس ده سبب مش رئيسى خالص بالمرة يعنى وسبب هامشى جدا وهو يعنى لو كان في حمامات كنا احنا اللى هناخدها مثلا
وبعدين عمرك سمعت عن محافظ نزل يفتتح حمام ؟
ولسه ليك كلام فى الكوممينت بتاع الشبح الرقمى

The Alien said...

نفسي أعرف مين اللي دماغة عالية للدرجادي
عشان يقعد يألف اﻷفكار والإختراعات دي

تحياتي

Mirage said...

the alien
ناس عايزة تجيب فلوس وتسترزق على قفا الشعب
قفا الشعب اللى داب من كتر التلطيش بس ولسه مستحمل برضه

Lost Love (found it now ) said...

عزيزي ...

ذكرني موضوعك بمقولة من مسرحية الواد سيد الشغال لما كانوا بيئولوا ان طقم السفرة دي غالي لان سينيه لان نابليون بوناربت مضى عليه، راح رد و قال يعني نابليون بونابرت ساب الحملة الفرنسية و الجيوش و الاسطول و قعد يمضى على شوية اطباق طيب اهو و راح مكسر له كم طبق .

بالظبط كده هو حال الوزير المشغول اوي ده ساب كل مشكال العاصمة من اكوام الزبالة اللي اودام البيوت و مية المجاري اللي ماليه الشوارع ليل و نهار و راح يفتتح حمام عمومي من اوب كرت.

يا ترى بئى ممكن لو الواحد رصيده خلص يعني و هو مزنوق مثلا هل تتوفر خدمة نقل الرصيد من كرت لكرت اخر يعني مثلا ممكن يخبط على الحمام اللي جنبه و يئولوا و النبي ابعت لي رصيد لان اكتشفت ان رصيده خلص. اتمنى ان الخاصية دي تكون موجودة في كروت الشحن لان بكده فعلا تبقى المشاكة اتحلت تماما.

و ممكن يسموها حمامات على غرار الالوهات الجديدة و نعمل اعلان كمان من بطولة النجوم المحبوبة و على الدنيا السلام

bebooooooo said...

عمار يا مصر عمار والله من قلة المشاريع يا بلد بس بجد خبر جامد والمحافظ ده شكله بيتكيف اوى من الحمامات
يلا الكيف بيزل بقى
تحياتى

Dalia said...

هو هيفتتح الحمامات ازاى

اكيد هيجربها عشان يشوفها تنفع ولا لاء
و الكاميرات هتصور بقي و هتبقي هييييييييييصه

حاجه عبيطه اوى ... احنا عندنا كل حاجه و مش ناقص غير المراحيض العموميه
:S

الشنكوتي الكبير said...

يا عم خليهم يفتحولنا حممات حلوه كده ونقعد ننبسط ومشد السيفون ونلعب في الشطافه يا سلام دي هاتبقى حاجه حلوه خالص وياسلام كده تبقى خارج انت والعزيزه الغاليه تتمشوا على النيل او في وسط البلد وتقولها تعالي يا حبيبتي انا هاعزمك على مكان فخم قوي
ههههههههههههه
عموما هي الفكره نفسها انهم يعملولنا حممامات مش بطاله انا ساعات ببقى في وسط البلد واقول هي ازازة البيبسي اللي شربتها دي هاصرفها فين دلوقتي وعادي يعني بنعتمد على العرق
المشكله الحقيقيه هي الحاجات اللي مالهاش لازمه زي حكاية الكروت دي واكيد مصاريف بالملايين عشان التظبيط والمقاولات والمحتاجات
عموما مش مهم المهم اننا هنلاقي حته للغلابه يضربوا فيها جوان البانجو على نضافه
سلاااااااااااااااااااااام
آه صحيح يا ريت تعلن عن يوم الأفتتاح يمكن يوزعوا ورق تواليت مجانا

Doba said...

عظيييمة يا مصر يا أرض النعم - نيلك وشعبك و............مش فاكرة باقى الاغنية

ياريت بس يبقى فيه دش لان الدنيا بتبقى حر قوى فلو الواحد هيدخل وياخد دش ويستكنيص كده ويدفع 50 قرش ده هيبقى اوفر من البيت

ثم حاجة تانية اصلا - اول مهيفتتحو الحمام بيومين كل لما حد يروح هيقولولو اصل الميه قاطعه فوت علينا بكرة يا سيد

سلاموز و أففففففففففففففف

تامر حسين said...

ههههههههه
انا بتخيل المنظر وهو بدل مبيقطه الشريط بالمقص بيقطع بكره مناديل ههههههه
وياسلام بقي وهو بيحط حجر الاساس
تقريبا ممكن يحط حاجا تانيه بدل الطوبه والجبس يعني ممكن يكون طوبه فعلا بس بدل الجبس يبقي ______
تحياتي
وعلي فكره بكره هتلاقي الاسوار كلها مكتوب عليا متاح التبول هنا

smraa alnil said...

هههههههههههههههه

كابتن كابتن
انا ليا لسان ممكن اقوله كلمة مش كويسة

طب والله ضحكت

يا ىعم الشعب المصري مش بيغلب

ورا اي حيطة وصرف نفسك
لكن المنظرة بعيد عنك هي اللي موديانا في داهية

يا سيدي ايه في حياتنا مش يحرق الدم يا حورية
المواصلات مش تحرق الدم
العيش والعيشة واللي عايشينها مش بيحرقوا الدم

بلد الاف حمام

يبقي احنا لينا الصدارة الوحيدة الي في العالم اللي هنبني حمامات
قولنا هنبني وادينا بنينا التوالياتت
يا نهار اسود علي التهييس يا جدعان
يعني هي خلاص
ضاقت بينا الدنيا ومش ناقصنا حاجة غير الحمامات

وكمان بخمسين قرش

وهتلاقي حد قاعد برة الحمام يقولك عايز نص جنيه زيادة
ليه يا عم
الله يا بيه
مش انا اللي ماسكلك المناديل
دة انا منضف الحمام ومخليه سوبر لوكس
يعني هتأجروا مفروش
يا بيه
دة المحافظ بنفسه هو اللي مفتتحه
وعشان تخلص منه هتدفع يعني هتدفع

لاااااااااازم تشرب

اهو منظر المحافظ وهو هيفتتح الحمامات دي هيبقي شكل محمد هنيدي في صعيدي في الجامعه الامريكية
وهو لابس البنطلون ابو دكة دة
لما وقع في الترعه وقالهم كنت بتتفح ترعه جديدة

معلش يا ابني اعذرني علي التهييس دة
اصل عندي دور برد مخدرني بعيد عنك

Alexandrian far away said...

الحقيقه أنا عندى صدمه
من أغلب التعليقات
كأن الناس شايفه أنه الحمام ده كماليات وإن السلوك الطبيعي هو ممارسة ما تفعله الكلاب والقطط الضاله بجانب الجدران وفي الخرابات
طبعا يا ميراج تفاهه من المحافظ موضوع أفتتاح الحمامات العامة ده
لكن لما رئيس الجمهوريه - لامؤاخذه- بيهز طوله ويروح يفتتح كباري علويه وكباري مشاه يبقى مش عيب على حتة محافظ أنه يفتتح مراحيض
مش كده ولا أيه؟

whyme said...

بالعكس الموضوع ده متحضر جداً و يا ريت لو اتعمل نعرف نحافظ عليه

مش شرط انه علشان كل حاجه بايظه اننا منحاولش نعمل حاجه كويسه


تحياتى

بندقه said...

انت اصلك مش واخد بالك ان دى اول خطوه عشان (نريح )الناس
المحافظ عنده حق لازم نستريح
وبعدين ده مش اى حمام ده حمام ذكى

قاسم أفندي said...

جميل
وخصوصا طريقة الافتتاح
:))

اجندا حمرا said...

موضوع في الجون فعلا ياميراج

و معاك اي واحد يتزنق مش حيستني بقه يدخل كارت حيروح ورا اي شجره و لا عامود و لا اي زنأور و يديها بس الفكره لو حصل كده مع البنات حتعمل ايه مش حتعمل طبعا زي ماالولاد بتعمل ممكن تدخل كنتاكي و لا ماكدونلدز و تديها و مش لازم يعني تجيب حاجه منهم بس انا مع اللي قال ان الحمامت اللي بالكروت دي ممكن يكونوا عاملينها للسواح و بتهيئلي ممكن مايسمحوش لأي حد مصري انه يدخلها
اديك بتشوف الحمامات اللي في الشوارع ريحتها عامله ازاي و الواحد و الله بيكون علي اخره بس بيمسك نفسه عشان مايدخلش يجيب اللي في بطنه جوه و اهو قضا اخف من قضا
الفكره عزيزي ان موضوع الحمامات المتطوره مش رفاهيه صدقني و مانجيش نقول مش يفكروا في العشوائيات الأول
الفكره انهم لو جم عملوا حاجه للعشوائيات برضه الناس حتقول مش يفكروا في كذا افضل يعني الناس مابيعجبهاش العجب
الفكره انهم يرتبوا الدنيا بياخدوا ضرايب مننا من المفروض انهم يتجهوا لتحسين كل الحاجات التعليم المرافق كلو كلو بشويه تنظيم و ترتيب كله صدقني حيكون تمام
تحياتي علي الموضوع المميز
:)

عمرو غريب said...

معلش انا هاخرج عن الموضوع بالنسبة لموضوع التاريخ الي انت قولتة لي انا بعمل زي ما انت بتقول بالظبط بس لما اجي ادوس نشر القي الموضوع مش بيتنشر فبضطر اغير التاريخ الي تاريخ اقدم ياريت يكون كلامي وصل لك ولو عندك حل لتلك المشكلة اكون مشكور لك والف شكر علي اهتمامك

nickname said...

أنا لما أتزنق أفكها بأقرب فندق

أصلي أنا بوسوس من الحمامات العمومي

و عندي قانون يقول

البوله في أي مكان و الكاكا بالبيت

أو بالشيراتون

و لو كان في بحر

مافيش مشاكل

علاء said...

أنا محتاج رأيك بخصوص الموضوع ده

تجمع مدوني مصر .. حقيقة قابلة للتنفيذ أم حلم بعيد عن الواقع

Doba said...

ايه بقى هنتنينا فى ريحة الافيه دى كتير بقى ولا ايه

عاوزين نرجع للرومانسية - ولا هيه أخدتك خلاص خالص مننا

مانتش باين ولا حتى فى التعليقات بتاعة الآخرين - عبرنا شوية يا عم

هبة

ياسر سليم said...

ايه يا عم

ما انته عايش اهوه .. عامل ايه ..

انا قلت لما ابص عليك .. لقيت الموضوع الجامد ده ..

وانا رأييى فى الموضوع ان احنا الشعب المصرى كده .. ما بيعجبناش العجب .. كل حاجة معترضين عليها .. واى خطوة الدولة بتتخذها للتقدم احنا نحبط في الدولة ورجالها ..

sendrlla said...


ههههههههههههههههههههههههههههههه
على فكره موضوع كوميدى خالص

اجمل حاجه انهم يعملوها بكروت شحن زى الموبايلات واللى كرته خلص اما يشترى كارت اما حد يحوله بخمسه جنيه رصيه او ما يدخلش ويعملوا بقى محلات لبيع كروت دخول احمامات بالعاصمه
ياه ويعملوا اعلانات فى كل مكان وعلى الحيطان بقى زى الانتخابات كده

بس عندنا مشكله الناس اللى مش من العاصمه وجاين يخلصوا مصلحه وعايزين الحمام ومش معاهم كروت شحن لانهم هيستخسروه هيجبوه على زياره وهيرموه
الناس دى غلبانه مفروض يعملولهم حمامات خاصه ويكتبوا عليه للمغتربين فقط

ههههههههههههههههههههههههههههههههههههههههههههههههههه
والله موضوع يموت من الضحك

Mirage said...

Lost Love (found it now )

وممكن كمان نعمل حملة زى حملة بيبسى كده
بس بدل بحر النجوم نخليها بحور الكلينيكس
وموضوع نابليون اللى ساب الحملة الفرنسية ده تشبيه فى قلب الجون على المحافظ اللى نازل يفتتح حمام ده
حاجة تقرف والله




bebooooooo
ممكن تكون الحمامات ليها معزة خاصة عنده عشان بيحب مثلا ياخد قهوة الصبح مع الجرنان على الريحة



Dalia
انا عارفة ياختى
دى حاجة تجيب المرارة والضغط



الشنكوتي الكبير

على فكرة هو يوم الافتتاح موجود فى اول جملة فى البوست
وياريت اشوفك هناك بقى
بس متنساش تجيب معاك حاجة تاخد فيها

الكلينيكس والصابون السائل


Doba
ان شاء الله هيبقى فى دش ودش كمان
عشان كل متدخلى تتفرجى على سيادة المحافظ لما كان بيفتتح الحمام
انا نفسى قناة فضائية تغطى الحدث ده
عشان تورى العالم السخافات اللى بتحصل فى مصر



تامر حسين
اه تخيل فعلا انه بيحط ...... بدل الجبس والاسمنت
دى تبقى حاجة خـ..... فعلا
هههههههههههه


smraa alnil
سلامتك من دور البرد اولا
وشوية التهييس دول ضحكونى كيييييييييك
ومعاكى ان اللى قاعد على الباب ده لازم هيطلب فلوس طبعا
هو يعنى قاعد منظر كده


Alexandrian far away
اكيد طبعا اذا كان رب البيت بالدف ضاربا فشيمة اهل البيت الرقص
فاتتنى دى



whyme
انتى شايفة انه متحضر لدرجة ان المحافظ ينزل يففتحه يعنى ؟
انا شايف انه فراغ محافظ مش لاقى حاجة يعملها
اما لما هيفتتحوا المتحف المصرى الجديد هيجيبوا جورج بوش من بره يفتتحوا ولا ايه ؟

Mirage said...

بندقه
ده شكله عبقرى
مش ذكى وبس
بدليل ان المحافظ هو اللى نازل بنفسه يفتتحه



قاسم أفندي
انا اكتر حاجة محيرانى طريقة الافتتاح دى



اجندا حمرا
ولهى ياأجندة اذا كان على السياح
فيبقوا يعملوا حسابهم قبل مينزلوا من البيت
واكيد ان هيبقى مسموح طبعا للمصريين انهم يدخلوها
امال هتتزبل ازاى يعنى
ثم انك تجاهلتى موضوع المحافظ خالص فى تعليقك مع ان ده صميم الموضوع بتاعى
صدقينى مفيش حاجة هتبقى تمام



عمرو غريب
انا مش عارف اقوللك ايه
انت حيرتنى معاك ياعمرو


nickname said...
مش انتى لوحدك
فى واحد صاحبى عنده وسوسة جامدة قوى برضه


علاء
انا رايح اسيبى رأيي عندك حالا


Doba
انا راجعلك بعد خمش دقائق بالظبط



ياسر سليم
تقدم ايه بس
صلى على النبى
حمامات ايه اللى فيها تقدم دى
بذمتك انت شايف حاجة ايجابية بتتعمل اصلا فالبلد
ياراجل قول كلام غير ده
ومتغيبش كده
انا منزل البوست ده من اسبوع
فينك ياأستاذ كل ده


sendrlla
تصدقى ملاحظة مهمة جدا موضوع المغتربين ده
دول بقى مايكلوش ولا يشربوا لحد ميروحوا البلد
عشان ميحتاجوش ولاحمام وغيره

يا مراكبي said...

ده موضوع ظريف قوي .. عجبني كمان موضوع البيبي بتاع الإفتتاح ده

ههههه

أنا ماعرفش حاجة عن المحافظ غير إنه شمع محل واحد صاحبي في مصر علشان مايعملش دوشة جنب بيته

صاحبي ده إبن راجل واصل في مصر على فكرة .. لكن مافيش فايدة

هو حلف إنه مش راجع مصر تاني .. وسافر

will said...

情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品

麻將,台灣彩卷,六合彩開獎號碼,運動彩卷,六合彩,遊戲,線上遊戲,cs online,搓麻將,矽谷麻將,明星三缺一, 橘子町,麻將大悶鍋,台客麻將,公博,game,,中華職棒,麗的線上小遊戲,國士無雙麻將,麻將館,賭博遊戲,威力彩,威力彩開獎號碼,龍龍運動網,史萊姆,史萊姆好玩遊戲,史萊姆第一個家,史萊姆好玩遊戲區,樂透彩開獎號碼,遊戲天堂,天堂,好玩遊戲,遊戲基地,無料遊戲王,好玩遊戲區,麻將遊戲,好玩遊戲區,小遊戲,電玩快打,麻將,台灣彩卷,六合彩開獎號碼,運動彩卷,六合彩,線上遊戲,矽谷麻將,明星3缺一,橘子町,麻將大悶鍋,台客麻將,公博,game,,中華職棒,麗的線上小遊戲,國士無雙麻將,麻將館,賭博遊戲,威力彩,威力彩開獎號碼,龍龍運動網,史萊姆,史萊姆好玩遊戲,史萊姆第一個家,史萊姆好玩遊戲區,樂透彩開獎號碼,遊戲天堂,好玩遊戲,遊戲基地,無料遊戲王,好玩遊戲區,麻將遊戲,好玩遊戲區,小遊戲,遊戲區,電玩快打,cs online